रुकुमपश्चिमको मुसिकोट नगरपालिका–१ खलङ्गामा रहेको त्रिभुवन जनता माध्यमिक विद्यालयमा अनिश्चितकालीन तालाबन्दी गरेको छ ।

विद्यालयमा कार्यरत ६ जना कर्मचारीहरु पदमुक्त गरिएको भन्दै पीडित कर्मचारीले अल्टिमेटमसहित विद्यालयमा तालाबन्दी गरेको हो । जिल्लाको सबैभन्दा जेठो विद्यालयका रुपमा चिनिने यस विद्यालयमा गत वर्षदेखि विद्यालय प्रशासन, व्यवस्थापन समिति र कर्मचारीहरु बिच भएको विवादका कारण विद्यार्थीहरुको पठनपाठन प्रभावित भएको गुनासो बढेको छ ।

पदमुक्त गरिएका कर्मचारीहरुले आइतबार बिहानैदेखि विद्यालयको मूलगेटमा तालाबन्दी गरेर अल्टिमेटमसहित आन्दोलनमा उत्रेको जनाएका छन् । गत कात्तिक १४ गते विद्यालय प्रशासनले व्यवस्थापन समितिको निर्णय भन्दै कार्यरत ६ जना शिक्षक तथा कर्मचारीहलाई पदमुक्त गरेको थियो । विद्यालयका अधिकृत जयराम थापा, लेखापाल ठकबहादुर बुढाथोकी, पुस्तकालय सहायक रमा शाह, कार्यालय सहायक गौरी रावत र कार्यालय सहयोगीद्वय डमरबहादुर महत र दुर्गबहादुर खड्कालाई विभिन्न आरोपमा पदमुक्त गरिएको थियो ।

विद्यालय व्यवस्थापन समितिको पुस ६ गते बसेको बैठकले पुनः ६ जना कर्मचारीहरुलाई पदमुक्त गर्न निर्णय गरेकाले आफूहरु थप पीडित भएको आन्दोलनरत शिक्षकहरुको भनाइ छ ।

विद्यालय प्रशासन र व्यवस्थापन समितिको उक्त कदम नसच्चिएमा विरोधमा थप कार्यक्रम गर्दै जाने भन्दै पीडित कर्मचारीहरुको तर्फबाट अल्टिमेटम समेत जारी गरिएको छ ।