शिक्षा, विज्ञान तथा प्रविधि मन्त्रालयको उच्च व्यवस्थापन समूह (एसएमटी) बैठक मन्त्री विद्या भट्टराईको अध्यक्षतामा सम्पन्न भएको छ। बैठकमा आगामी आर्थिक वर्ष २०८२/०८३ को नीति, कार्यक्रम र बजेटबारे गहन छलफल भएको छ।
मन्त्री भट्टराईले संविधान, योजना र कानून अनुसार कार्यक्रम प्रस्ताव गर्न, लक्ष्य समयमै हासिल गर्न र समस्या समाधानमा गम्भीर हुन आग्रह गरिन्। उनले निर्णय कार्यान्वयनको स्वचालित प्रणाली, विज्ञान-प्रविधिमैत्री शिक्षा र नैतिकवान नागरिक उत्पादनमा जोड दिइन्।
बजेट मागमा आधारित हुनुपर्ने र कार्यक्रमको औचित्य, उपलब्धि र दीर्घकालीन प्रभाव स्पष्ट हुनुपर्ने उनको भनाइ थियो। उनले कार्यदलका सुझाव कार्यान्वयन र नयाँ शैक्षिक सत्र प्रभावकारी बनाउन पनि निर्देशन दिइन्।
योजना महाशाखा प्रमुखले बजेट सीमा जानकारी गराए। सचिवद्वयले सुझाव कार्यक्रममा समावेश गर्न, बजेट स्पष्ट बनाउन र पूर्व तयारीमा जोड दिए। डिजिटल सेवा, लक्ष्य कार्यान्वयन र कार्यसम्पादन मूल्याङ्कनमा ध्यान दिन सुझाव दिनुका साथै शोधभर्ना, लेखा परीक्षण र कार्यदल प्रतिवेदन कार्यान्वयनमा पनि निर्देशन दिएको छ।
निकाय प्रमुखहरूले प्रगति र सुझाव प्रस्तुत गरे। मन्त्रालयले १५ दिनभित्र कार्ययोजना प्राप्त गरी बजेटलाई अन्तिम रूप दिने तयारी गरेको छ। बैठकले आगामी बजेटलाई समयसापेक्ष र जनमुखी बनाउन योगदान पुर्याउने विश्वास लिइएको छ।
