नेपालको शिक्षा क्षेत्रमा महत्वपूर्ण योगदान पुर्याएका भक्तपुरका शिक्षाविद् प्राध्यापक पृथ्युचरण बैद्यलाई घरमै पुगेर सम्मान गरिएको छ ।
नेपाल शिक्षाशाश्त्री समाजले बैद्यको घर भक्तपुर पुगेर सम्मानपत्र वितरण गरेका हुन् । पोखरा विश्वविद्यालयका उपकुलपति एवं समाजका अध्यक्ष प्रा.डा. प्रेमनारायण अर्याल, प्रा.डा. तीर्थराज पराजुली र अर्का प्रा.डा. बासुदेव काफ्लेले संयुक्त रुपमा सम्मानपत्र वितरण गरेका हुन् ।
प्राध्यापक बैद्य उमेरका कारण हाल घर बाहिर निस्कन सक्नुहुन्न । यही कारण उनलाई घरमै पुगेर सम्मानपत्र वितरण गरिएको हो ।
प्राध्यापक वैद्यको जन्म १९९६ विक्रम सम्वत्मा भक्तपुरमा भएको थियो । विक्रम सम्वत् २०२० सालदेखि शिक्षा क्षेत्रमा समर्पित भएर लागेका उनी जीवनको सम्पूर्ण समय शिक्षा क्षेत्रमै समर्पित थिए । उनी त्रिभुवन विश्वविद्यालय शिक्षाशाश्त्रको डीन हुँंदै विक्रम सम्वत् २०६० सालमा सेवा निवृत भएका थिए ।
नेपाल शिक्षाशाश्त्री समाजले राजधानीमा सम्पन्न आफनो महाधिवेशन तथा राष्टिय सम्मेलनको अवसरमा विभिन्न व्यक्तित्वहरुलाई सम्मान गरेको थियो । त्यस अवसरमा प्राध्यापक वैद्यलाई पनि सम्मान गर्नुपर्ने थियो । तर उमेर हडका कारण बैद्य कार्यक्रममा सम्मान लिन जान नसकेपछि घरमै पुगेर प्रमाणपत्र वितरण गर्न समाजका पदाधिकारी पुगेका हुन् ।
