बालबालिकाको अन्तर्निहित क्षमतालाई प्रस्फुटन गराउने र उनीहरूको मस्तिष्क शक्तिको विकास गर्ने उद्देश्यका साथ शनिबार एक विशेष ‘ब्रेनपावर’ तालिम सफलतापूर्वक सम्पन्न भएको छ। श्रीहरी सेल्फ रियलाइजेसनल फाउन्डेसन र चमेरो बचत तथा ऋण सहकारी संस्थाको संयुक्त पहलमा आयोजित उक्त दुई घण्टे तालिममा काठमाडौँ उपत्यकाका तीनै जिल्लाबाट कक्षा ५ देखि १० सम्मका २९ जना बालबालिकाहरूले सक्रियतापूर्वक सहभागिता जनाएका थिए।
सहकारी संस्थाकै आफ्नै तालिम कक्षमा सञ्चालित सो कार्यक्रममा श्रीहरी सेल्फ रियलाइजेसनल फाउन्डेसनका संस्थापक अध्यक्ष चन्द्रहरी कायस्थले प्रशिक्षकको रूपमा सहजीकरण गर्नुभएको थियो। उहाँले बालबालिकाको स्मरण शक्ति, एकाग्रता र सिर्जनशीलता वृद्धि गर्ने प्राविधिक तथा व्यवहारिक पक्षहरूमा केन्द्रित रहेर प्रशिक्षण दिनुभएको थियो। तालिमको मुख्य आकर्षणका रूपमा दिमागको संरचना, यसको कार्यक्षमता र मस्तिष्कको विकासमा ध्यान तथा ज्ञानको भूमिका जस्ता विषयहरू रहेका थिए।
प्रशिक्षणका क्रममा अध्यक्ष कायस्थले दायाँ र बायाँ मस्तिष्कको छुट्टाछुट्टै कार्यक्षमता र यी दुवैलाई सन्तुलित रूपमा प्रयोग गर्दा प्राप्त हुने असाधारण सिकाई क्षमताका बारेमा प्रयोगात्मक जानकारी दिनुभयो। बालबालिकाहरूलाई कला, चित्र, संगीत, रङ र भावनाको माध्यमबाट कसरी छिटो र प्रभावकारी रूपमा सिक्न सकिन्छ भन्ने कुरालाई मनोरञ्जनात्मक शैलीमा सिकाइएको थियो। यसका साथै बालबालिकाको मस्तिष्कलाई हानि पुर्याउने तत्वहरू र असल संस्कारको महत्त्वका बारेमा पनि विशेष चर्चा गरिएको थियो।
तालिममा मस्तिष्कको स्वास्थ्य र आहारको सम्बन्धका बारेमा समेत सचेतना प्रदान गरिएको थियो। बालबालिकाको मानसिक विकासमा कस्ता खानेकुराले सकारात्मक प्रभाव पार्छन् र कुन खाद्यवस्तुले दिमागलाई सुस्त बनाउँछन् भन्ने जानकारीले सहभागीहरूलाई स्वास्थ्यप्रति सचेत गराएको थियो। चमेरो बचत तथा ऋण सहकारी संस्थाको बाल बचत समूहद्वारा आयोजित यस कार्यक्रममा सहभागी सम्पूर्ण बालबालिकालाई शैक्षिक सामग्रीका साथै खाजाको पनि व्यवस्था गरिएको थियो।
कार्यक्रमको समापनमा अभिभावकहरूले खुसी व्यक्त गर्दै यस्ता व्यवहारिक तालिमहरूले बालबालिकाको शैक्षिक र व्यक्तिगत जीवनमा दूरगामी प्रभाव पार्ने विश्वास व्यक्त गरे। परम्परागत शिक्षा भन्दा फरक र जीवनोपयोगी शैलीमा सञ्चालित यो तालिमले बालबालिकाहरूमा नयाँ ऊर्जा र आत्मविश्वास भरेको आयोजक पक्षले जनाएको छ।
