सूर्यविनायक नगरपालिका–३, बालकोटमा अवस्थित इडेन गार्डेन इङ्ग्लिस स्कुलमा अतिरिक्त कक्षा कार्यक्रम अन्तर्गत आयोजित अबाकस प्रतियोगिता तथा हस्तलेखन प्रदर्शनी भव्यताका साथ सम्पन्न भएको छ ।
बालबालिकाको दिमागी विकास, एकाग्रता वृद्धि, स्मरणशक्ति सुदृढीकरण तथा छिटो र सही निर्णय क्षमताको विकासमा अत्यन्त प्रभावकारी मानिने अबाकस शिक्षालाई विद्यालयले नियमित पाठ्यक्रमसँगै अतिरिक्त कक्षाका रूपमा सञ्चालन गर्दै आएको छ । यसै कार्यक्रमको उपलब्धि उजागर गर्ने उद्देश्यले विद्यालय स्तरीय अबाकस प्रतियोगिता आयोजना गरिएको हो, जहाँ विद्यार्थीहरूले तीव्र गणनात्मक क्षमता, आत्मविश्वास र तार्किक सोच प्रस्तुत गरेका थिए ।
त्यसैगरी, सुन्दर, स्पष्ट र अनुशासित लेखन शैली विकास गर्न महत्वपूर्ण मानिने हस्तलेखन अभ्यासलाई व्यवहारमा उतार्दै विद्यार्थीहरूले आफ्नै सिर्जनात्मक लेखनका माध्यमबाट हस्तलेखन प्रदर्शनी प्रस्तुत गरेका थिए । हस्तलेखनले बालबालिकाको ध्यान केन्द्रित गर्ने क्षमता, धैर्य, सौन्दर्यबोध र व्यक्तित्व विकासमा महत्वपूर्ण भूमिका खेल्ने विश्वास विद्यालयले लिएको छ ।
कार्यक्रम BAL BIKASH NCMAS सँगको सहकार्यमा सम्पन्न भएको हो । कार्यक्रममा BAL BIKASH NCMAS का प्रबन्ध निर्देशक तेजु नेपालले अबाकस शिक्षाले बालबालिकाको दुवै मस्तिष्क (दायाँ र बायाँ) सक्रिय बनाउने, आत्मविश्वास बढाउने र शैक्षिक उपलब्धिमा सकारात्मक प्रभाव पार्ने विषयमा अभिभावकहरूलाई जानकारी गराउनु भएको थियो ।
कार्यक्रममा सहभागी सम्पूर्ण विद्यार्थीहरूको उत्साह, अनुशासन र प्रस्तुतीको प्रशंसा गर्दै विद्यालयका भाइस प्रिन्सिपल अनिश राईले “अबाकस र हस्तलेखन जस्ता अभ्यासले बालबालिकाको शैक्षिक सफलतासँगै जीवनोपयोगी सीप र व्यक्तित्व विकासमा समेत महत्वपूर्ण योगदान पुर्याउँछ” भन्दै सबै विद्यार्थीहरूलाई बधाई तथा शुभकामना व्यक्त गर्नु भयो ।
कार्यक्रम सफल बनाउन मेहेनत गर्नुहुने अबाकस प्रशिक्षक, शिक्षक–शिक्षिका, विद्यालय प्रशासन तथा सहयोगी कर्मचारीहरूप्रति विद्यालयले हार्दिक धन्यवाद व्यक्त गरेको छ । साथै आफ्ना नानीहरूको प्रतिभा पहिचान, विकास र प्रोत्साहनमा निरन्तर साथ दिने अभिभावकहरूप्रति विद्यालयले विशेष कृतज्ञता प्रकट गरेको छ ।
इडेन गार्डेन इङ्ग्लिस स्कुलले आगामी दिनहरूमा पनि बालबालिकाको सिर्जनात्मकता, बौद्धिक क्षमता र आत्मविश्वास अभिवृद्धि गर्ने यस्ता ज्ञानवर्धक तथा प्रतिभा प्रस्फुटनका कार्यक्रमहरूलाई निरन्तरता दिने प्रतिबद्धता व्यक्त गरेको छ ।
