बागमती प्रदेश सरकार अन्तर्गतको उद्योग तथा वाणिज्य कार्यालय भक्तपुरले आर्थिक वर्ष २०८२/८३ को वार्षिक कार्यक्रम अनुसार विभिन्न सीपमूलक तालिमहरू सञ्चालन गर्ने घोषणा गरेको छ। यस कार्यक्रमको मुख्य उद्देश्य स्थानीय युवा र उद्यमी बन्न इच्छुक व्यक्तिहरूलाई सीप प्रदान गरी आत्मनिर्भर बनाउनु रहेको छ।
कार्यालय प्रमुख राम प्रसाद कुस्माले सेरामिक्स, बोतल आर्ट, मिठाई बनाउने, बेसिक ब्युटी पार्लर, नेवारी परिकार र डिजिटल मार्केटिङ जस्ता महत्वपूर्ण विषयहरूमा निःशुल्क तालिम प्रदान गरिने बनाउनु भयो। मिठाई बनाउने तालिम चाँगुनारायण नगरपालिकाका बासिन्दाहरूका लागि र नेवारी परिकार बनाउने तालिम मध्यपुर थिमि नगरपालिकाका बासिन्दाहरूका लागि विशेष रूपमा लक्षित गरिएको छ।
यस तालिममा सहभागी हुन चाहने व्यक्ति नेपाली नागरिक हुनुपर्ने र कम्तीमा १६ वर्ष उमेर पूरा गरेको हुनुपर्ने प्रावधान छ। विशेषगरी आर्थिक रूपमा विपन्न, सीमान्तकृत, अपाङ्गता भएका व्यक्ति, वैदेशिक रोजगारीबाट फर्केका युवा र नयाँ उद्यम सुरु गर्न चाहने नागरिकहरूलाई छनोटमा प्राथमिकता दिइने कार्यालयले जनाएको छ।
आवेदनका लागि इच्छुक व्यक्तिले नागरिकताको प्रतिलिपि, दुई प्रति पासपोर्ट साइजको फोटो र तालिमपछि गर्ने व्यवसायको संक्षिप्त योजना सहित सात दिनभित्र कार्यालयमा सम्पर्क गर्नुपर्नेछ। यो तालिम पूर्ण रूपमा निःशुल्क हुनेछ र आवेदन फारम कार्यालयको वेबसाइट वा सेवाप्रवाह कक्षबाट प्राप्त गर्न सकिनेछ। भक्तपुरको सूर्यविनायकमा रहेको यस कार्यालयले दक्ष जनशक्ति उत्पादन गरी ‘उद्यमशील संस्कृति, राष्ट्रको समृद्धि’ भन्ने नारालाई सार्थक बनाउने लक्ष्य राखेको छ।
