आगामी फागुन २१ गते सम्पन्न हुन लागेको प्रतिनिधि सभा सदस्य निर्वाचनलाई लक्षित गरी निर्वाचन आयोगले फागुन ३ गतेदेखि १७ गतेसम्म विशेष मतदाता शिक्षा कार्यक्रम सञ्चालन गर्ने तयारी पूरा गरेको छ।
निर्वाचन आयोगका प्रवक्ता नारायण प्रसाद भट्टराईका अनुसार आगामी निर्वाचनलाई सफल तुल्याउन मतदाताको सचेत र सक्रिय सहभागिता अपरिहार्य छ। त्यसैले आम नागरिकलाई निर्वाचनको समग्र प्रक्रिया बुझाउन, आफ्नो मताधिकारको गहिरो महत्त्व बोध गराउन र मतदान गर्ने सही विधिबारे समयमै सुसूचित गर्ने उद्देश्यका साथ आयोगले यो बृहत् र विशेष अभियानको थालनी गर्न लागेको हो।
नेपालको संविधान र निर्वाचनसम्बन्धी प्रचलित कानुनको भावना अनुरूप निर्वाचन शिक्षा तथा मतदाता शिक्षा निर्देशिका २०७८ को दफा १७ बमोजिम यो विशेष अभियान सञ्चालन हुन लागेको हो। देशभरका ६ हजार ७४३ वटै वडाहरूमा मतदाता शिक्षा स्वयंसेवकहरू प्रत्यक्ष रूपमा परिचालन गरी प्रत्येक नागरिकको घरदैलोसम्म पुग्ने लक्ष्य आयोगले राखेको छ। प्रतिनिधि सभा सदस्य निर्वाचनलाई स्वच्छ, स्वतन्त्र, निष्पक्ष तथा विश्वसनीय वातावरणमा सम्पन्न गर्नु आयोगको मुख्य दायित्व भएकाले यसपटक मतदाता शिक्षालाई थप प्रभावकारी र प्रविधिमैत्री समेत बनाइएको छ।
यस १५ दिने अभियानका क्रममा स्वयंसेवकहरूले मतपत्रमा सही तरिकाले छाप लगाउने प्रक्रिया सिकाउनुका साथै बदर मतको सङ्ख्या घटाउन व्यावहारिक प्रदर्शन समेत गर्नेछन्। मतदाताहरूलाई आफ्नो एक मतको मूल्य बुझाउँदै लोकतान्त्रिक अभ्यासमा सक्रिय सहभागी हुन प्रोत्साहित गरिनेछ। प्रवक्ता भट्टराईले निर्वाचनको वातावरणलाई थप उत्साहजनक बनाउन र मतदातामा हुनसक्ने अन्योल चिर्न यो विशेष कार्यक्रम कोसेढुङ्गा सावित हुने विश्वास व्यक्त गर्नुभएको छ। आयोगले फागुन १७ गतेसम्मको अवधिमा सम्पूर्ण मतदातासम्म सूचनाको पहुँच पुर्याउने गरी कर्मचारी र स्रोत साधनको व्यवस्थापन गरिसकेको छ।
