नेपाली प्रयोगकर्ताको डिजिटल आवश्यकतालाई मध्यनजर गर्दै पूर्णतः नेपालीपन झल्किने नयाँ बहुआयामिक एप ‘हजुर एआई’ औपचारिक रूपमा सञ्चालनमा आएको छ। ‘नेपालीका लागि, नेपालीद्वारा निर्मित’ भन्ने मूल नाराका साथ फागुन १७ गतेदेखि यो एपले आफ्नो सेवा सुरु गरेको हो। एउटै प्लेटफर्मभित्र सामाजिक सञ्जाल, आर्टिफिसियल इन्टेलिजेन्स, शिक्षा, स्वास्थ्य र मनोरञ्जनका सुविधाहरू समेटेर यसलाई नेपाली ‘सुपर एप’ को रूपमा प्रस्तुत गरिएको छ।
एपको सबैभन्दा रोचक पक्ष यसको सामाजिक सञ्जाल फिचर ‘ठीकठाक’ हो जहाँ प्रयोगकर्ताले राख्ने प्रत्येक पोस्टको गुणस्तर र लोकप्रियताका आधारमा ‘ठीकठाक स्कोर’ प्रदान गरिन्छ। यस स्कोरका आधारमा हरेक महिना उत्कृष्ट १०० जना प्रयोगकर्तालाई नगद पुरस्कार दिइनेछ भने महिनाकै उत्कृष्ट क्रिएटरले २५ हजार रुपैयाँ नगद प्राप्त गर्ने व्यवस्था मिलाइएको छ। यसले नेपाली युवाहरूलाई रचनात्मक डिजिटल सामग्री निर्माणमा विशेष प्रोत्साहन गर्ने कम्पनीको विश्वास छ।
प्रविधि र भाषालाई जोड्न एपले आफ्नै एआई च्याटबोट ‘हजुर एआई च्याट’ पनि सार्वजनिक गरेको छ जसले नेपाली भाषा सजिलै बुझ्छ र प्रतिक्रिया दिन्छ। यसले विद्यार्थीलाई अध्ययनमा र सामान्य प्रयोगकर्तालाई जानकारी खोज्न मद्दत गर्नेछ। साथै भाषा सिकाइअन्तर्गत कथामार्फत विभिन्न भाषाहरू सिक्न सकिने र उत्कृष्ट प्रदर्शन गर्नेले मासिक १५ हजार रुपैयाँसम्म पुरस्कार पाउने सुविधा पनि राखिएको छ। स्वास्थ्य सचेतनाका लागि नेपाली भाषामै ध्यान र श्वास–प्रश्वास अभ्यास सिक्न ‘प्राणायाम’ फिचर समावेश गरिएको छ।
मनोरञ्जनतर्फ समाचार, संगीत, रेडियो, नेपाली चलचित्र र टेलिभिजन च्यानलहरू एउटै फिडमा उपलब्ध हुने भएकाले प्रयोगकर्ताले एकीकृत डिजिटल अनुभव प्राप्त गर्नेछन्। विशेष लन्च अफरअन्तर्गत आगामी जुलाई १, २०२६ सम्म सबै प्रिमियम सुविधाहरू निःशुल्क उपलब्ध गराइएको छ। इच्छुक प्रयोगकर्ताले कम्पनीको वेबसाइटमा गई आफ्नो अकाउन्ट दर्ता गरेर यो सेवाको लाभ लिन सक्नेछन्।
