शिक्षाका साथसाथै संस्कार र अनुशासनमा जोड दिँदै प्रगतिशील सोचको रूपान्तरित शिक्षा दिँदै आएको मध्यपुर ठिमीको विनायक शिक्षा निकेतन इङ्लिस स्कुलमा कक्षा १० मा अध्ययनरत विद्यार्थीहरूका लागि जीवन शिक्षा एवं संस्कार र कर्तव्य बोध सम्बन्धी ज्ञान दिने उद्देश्यले दुई दिने सेमिनार कार्यक्रमको आयोजना गरेको छ।
नेपाल मैत्रीय गुठीको भवन चापागाउँमा आयोजित उक्त आवासीय कार्यक्रममा विद्यार्थीहरूलाई सफल र सार्थक जीवनका लागि गर्नुपर्ने कार्यहरू , हाम्रो जीवनमा अनुशासन, शिष्टता, विनयशीलता, असल संस्कार र जीवन मूल्य सम्बन्धी ज्ञान प्रदान गरिएको थियो।
विद्यालयका सहायक प्रिन्सिपल प्रेमप्रसाद निरौलाको नेतृत्वमा सहभागी विद्यार्थीहरूले अन्तरक्रियात्मक शैलीमा अत्यन्तै जीवन उपयोगी र व्यवहार उपयोगी ज्ञान प्राप्त गरी आफूभित्रको ज्ञानको क्षितिजलाई फराकिलो पार्न सफल भएका थिए।
कार्यक्रममा अन्तर्राष्ट्रिय प्रशिक्षक एवं संस्थाका गुरु फानले विद्यार्थीहरूलाई जीवनमूल्य र मान्यता सम्बन्धी दीक्षा दिएका थिए भने नेपाल मैत्रीय गुठीका संरक्षक सानुकाजी डंगोल, प्रशिक्षकहरू डोलराज घिमिरे ,सुजन बजगाई, सृष्टि डंगोल, रश्मी केसी र पुनम जोशी लगायतले अत्यन्तै रमाइलो तथा आकर्षक शैलीमा विद्यार्थीहरूका मन र मस्तिष्कमा पुग्ने गरी जीवन शिक्षा र असल संस्कार सम्बन्धी ज्ञान प्रदान गरेका थिए।
विशेष गरेर जीवनको सार र अर्थ, सफलताका सूत्रहरू, आमाबुबाप्रतिको कर्तव्य, गन्तव्यमा पुग्न जीवनमा गर्नुपर्ने प्रतिज्ञा एवं विश्वास र अभ्यास शीर्षकमा वक्ताहरुले प्रकाश पारेका थिए।
कार्यक्रमको अन्त्यमा विद्यार्थीहरूले आफूले सिकेका कुराहरू व्यक्त गर्दै अथाह ज्ञानको रसपान गराएर जीवन सफल र सार्थक पार्ने उपाय बताइदिनु भएकोमा गुठी परिवार एवं सम्पूर्ण प्रशिक्षकहरूलाई धन्यवाद ज्ञापन गरेका थिए।
साथै विद्यालय परिवार एवं सम्पूर्ण विद्यार्थीको तर्फबाट नेपाल मैत्रीय गुठी परिवारप्रति हार्दिक आभार र कृतज्ञता ज्ञापन गर्दै सहायक प्रिन्सिपल प्रेमप्रसाद निरौलाले धन्यवाद समेत ज्ञापन गरेका थिए भने यस्ता सभ्यता, सुसंस्कारी ज्ञानले विद्यार्थीको असल चरित्र निर्माण गर्ने अझ सशक्त र जीवन उपयोगी ज्ञान संस्थाले प्रदान गर्दै जाओस् भन्ने शुभकामना समेत दिएका थिए।
