प्राविधिक शिक्षा तथा व्यावसायिक तालीम परिषद् (सीटीईभीटी) ले सम्बन्धन स्वीकृति नभएका शिक्षण संस्थामा भर्ना नगर्न अभिभावक विद्यार्थीलाई अनुरोध गरेको छ ।
सीटीईभीटीले स्वीकृति नलिई केही शिक्षण संस्थाले विभिन्न कार्यक्रमहरूमा विद्यार्थी भर्ना आह्वान गरेको प्रति यस परिषद्को गम्भीर ध्यानाकर्षण भएको भन्दै यस्तो अनुरोध गरेको हो ।
प्राविधिक शिक्षा तथा व्यावसायिक तालीम परिषद् ऐन २०४५ तथा परिषद् नियमावली २०५१ अनुसार प्रमाणपत्र/डिप्लोमा तह सम्मका कार्यक्रम सञ्चालन/स्वीकृति दिने कानुनी अधिकार यस परिषद् समक्ष रहेकोमा यस परिषद्बाट सम्बन्धन नलिइ प्रशिक्षार्थी भर्ना गराएमा कानुनी कारबाही गर्ने चेतावनी समेत दिएको छ ।
‘प्रचलित प्राविधिक शिक्षा तथा व्यावसायिक तालीम परिषद् ऐन २०४५, परिषद् नियमावली २०५१ विपरीत हुने गरी विद्यार्थी/प्रशिक्षार्थी भर्ना गरेको पाइएमा कानुन बमोजिम कारबाही हुने व्यहोरा यसै विज्ञप्ति मार्फत सम्बन्धित सबैलाई जानकारी गराइन्छ ।’ विज्ञप्तिमा भनिएको छ ।
