भक्तपुरको सल्लाघारीस्थित अक्सफोर्ड प्राक्टिकल स्कुलले ‘विन्टर क्याम्प’ सुरु गरेको छ । जाडो बिदामा रहेका विद्यार्थीहरुलाई लक्षित गरी विद्यालयले तीन दिनको क्याम्प सुरु गरेको हो ।
विद्यार्थीलाई प्रयोगात्मक विधिले गुणस्तरीय शिक्षा दिनुपर्छ भन्ने मान्यताले अघि बढिरहेको भक्तपुरको सल्लाघारीस्थित सो स्कुलले गरेको विन्टर क्याम्पमा कक्षा ५, ६ र ७ अध्ययनरत विद्यार्थीहरु सहभागी भएका छन् ।
सो क्याम्पको उद्घाटन विद्यालय व्यवस्थापन समितिका अध्यक्ष एवम् शिक्षासेवी राम दुवालले वृक्षरोपण गरी गरेका थिए । सो क्रममा अध्यक्ष दुवालले विद्यार्थीलाई व्यवहारपरक सीप प्रदान गर्नका लागि क्याम्प उपयोगी भएको बताए।
उनले विद्यार्थीहरुले पठनपाठनका अलावा सामाजिक काममा पनि आफूलाई दक्ष र योग्य बनाए मात्र आफू समाज र देशका लागि योग्य हुने चर्चा गर्दै विद्यार्थीमा समस्या समाधान गर्ने सीप क्याम्पले दिने जानकारी दिए ।
स्कुलको इतिहासमा पहिलोपटक गरिएको सो क्याम्पले विद्यार्थीको सर्वाङ्गीण विकासका लागि सहयोग पुग्ने विद्यालयका प्रिन्सिपल रवि दुवालले बताए ।
क्याम्पमा सहभागी विद्यार्थीलाई योग र ध्यान, संगीत कक्षा, आत्मरक्षा सीप, चित्रकला, पाक कला, रञ्जना लिपिलगायतका विषयमा पोख्त बनाउने कार्यक्रम रहेको क्याम्पका कोअर्डिनेटर शिक्षक शिव भुजुले बताए ।
क्याम्पमा चुलाइ मुखियाले मार्सल आर्ट, योग र मेडिटेशनबारे मनिता नेपाल, संगीतबारे सुमन गैंडा, चित्रकलाबारे नवीन मानन्धर, क्राफ्टबारे जीवन सुवाल र निर्जला प्रजापति, मोटिभेसनबारे लक्ष्मी पान्डे, पाककलाबारे सुनिल दुवाल, फुटसलबारे सुदिप मगर र आदिम दुवाल, प्राथमिक उपचार तालिमबारे शिवराम त्वायना र क्यालिग्राफीबारे आशकुमार चिकंबञ्जारले कक्षा लिने कार्यक्रम रहेको विद्यालयले जनाएको छ ।
सो क्याम्पले विद्यार्थीमा रहेको प्रतिभा, क्षमता र दक्षता अभिवृद्धि गरी सिर्जनशील बनाउन सहयोग पुग्ने आयोजक विद्यालयका शिक्षक जीवन सुवालले बताए ।
अहिले क्याम्पमा सहभागी विद्यार्थीहरु विभिन्न सीप सिक्न तथा समूहमा काम गर्न आफूलाई व्यस्त बनाइरहेका छन् । सो क्याम्प शुक्रबार सम्पन्न हुनेछ।
