वागीश्वरी कलेजको आयोजनामा बागमती प्रदेश सरकार, सामाजिक विकास मन्त्रालय, शिक्षा विकास निर्देशनालयको सहयोगमा वागीश्वरी कलेजमा अध्यापनरत शिक्षकलाई अनुसन्धानमूलक लेखन र प्रकाशनसम्बन्धी दुई दिने कार्यशाला गोष्ठी सुरु भएको छ ।
गोष्ठीका प्रमुख अतिथि कलेज व्यवस्थापन समितिका अध्यक्ष तथा भक्तपुर नगरपालिकाका प्रमुख सुनिल प्रजापतिले कार्यशाला गोष्ठी सफलताको निम्ति शुभकामना दिँदै वागीश्वरी कलेज अनुसन्धानको क्षेत्रमा क्रमशः सक्षम हुँदै गएकोमा खुसी व्यक्त गरे ।
पिछडिएको जिल्लाको रूपमा परिभाषित भक्तपुर जिल्लालाई ‘एक घर एक स्नातक’ को मूल उद्देश्य लिएर अघि बढ्दा आज कला संस्कृतिसँगै शिक्षालगायतका क्षेत्रमा नमूना बनाउन सफल भएको दृष्टान्त प्रस्तुत गर्दै हामीले अनुसन्धानमा गरेको मिहिनेतले भोलि आउने पिँढीलाई मार्गनिर्देशन गर्ने बताए ।
वागीश्वरी मा.वि. व्यवस्थापन समितिका अध्यक्ष तथा भक्तपुर नगरपालिका वडा नं. ९ का वडाध्यक्ष रवीन्द्र ज्याख्वले शिक्षालाई उत्पादनमूलक, सक्षम, व्यावहारिक बनाउँदा विद्यार्थीहरूको गुणस्तरमा वृद्धि हुने बताउँदै वागीश्वरीले पढाइसँगै विद्यार्थीहरूलाई उद्यमशील हुन प्रेरित गर्दै आएकोमा खुसी व्यक्त गरे ।
वागीश्वरी कलेजका प्राचार्य धनकुमार श्रेष्ठले शिक्षक सक्षम भए गुणस्तरीय विद्यार्थीहरू उत्पादन हुने भएकाले यस्ता कार्यशाला गोष्ठीहरू शिक्षक विद्यार्थीहरू सबैलाई आवश्यक रहेको बताए ।
कार्यक्रमका सभापति वागीश्वरी अनुसन्धान व्यवस्थापन एकाइका संयोजक सिद्धिवीर कर्माचार्यले वागीश्वरी कलेजबाट भएका अनुसन्धानात्मक गतिविधिबारे चर्चा गर्दै अनुसन्धान जहाँ हुन्छ त्यस क्षेत्रमा पढाइ परिष्कृत हुँदै जाने बताए ।
कार्यशाला गोष्ठीमा त्रिभुवन विश्वविद्यालयका उपप्राध्यापकद्वय डा. कोमल फुयाल र डा. शिव रिजाल स्रोतव्यक्ति रहेको छ । वागीश्वरी कलेजको अनुसन्धान समितिका संयोजक तथा उपप्राध्यापक मोहनकृष्ण श्रेष्ठले स्वागत गरेको उक्त कार्यक्रममा उपप्राध्यापक विकल प्रजापतिले पनि बोलेका थिए ।
