प्युठान नगरपालिकाले शैक्षिक सत्र २०८१-८२ मा उत्कृष्ट नतिजा ल्याउने दुई सामुदायिक विद्यालयलाई नगदसहित सम्मान गर्ने निर्णय गरेको छ।
नगर शिक्षा समितिको हालै बसेको बैठकको निर्णयअनुसार, माध्यमिक शिक्षा परीक्षा (एसईई) मा नगरभित्र उत्कृष्ट स्थान हासिल गरेको शारदा माध्यमिक विद्यालय, सापडाँडा लाई ३ लाख रुपियाँ नगद पुरस्कार प्रदान गरिनेछ। त्यसैगरी, कक्षा ८ मा उत्कृष्ट नतिजा ल्याउन सफल भएको बालज्योति माध्यमिक विद्यालय, गेजवाङ ले २ लाख रुपियाँ पुरस्कार प्राप्त गर्नेछ।
नगर प्रवक्ता तथा वडा नं ३ का अध्यक्ष सुमनराज श्रेष्ठका अनुसार, यस कार्यक्रमले सामुदायिक विद्यालयहरूलाई अझ बढी लगनशील भई गुणस्तरीय शिक्षा प्रदान गर्न प्रेरित गर्नेछ।
७४ वर्ष पुरानो शारदा माध्यमिक विद्यालयको एसईई नतिजा विशेष रूपमा प्रशंसनीय छ। गत वर्षदेखि मात्र कक्षा १० सम्म पढाइ सुरु गरेको यस विद्यालयले पहिलो पटक एसईईमा सहभागी भएका २३ जना विद्यार्थीमध्ये २१ जनालाई उत्तीर्ण गराउँदै ९१.३० प्रतिशतको उच्च सफलता हासिल गरेको छ। यो उपलब्धिले विद्यालयलाई नगरभित्र पहिलो र समग्र जिल्लाभरि दोस्रो स्थानमा स्थापित गरेको छ।
प्युठान नगरपालिकाले आगामी दिनमा पनि यस्ता प्रोत्साहन कार्यक्रमहरूलाई निरन्तरता दिने प्रतिबद्धता व्यक्त गरेको छ।
