नववर्ष २०८३ को शुभ उपलक्ष्यमा **हाम्रो लघुकथा केन्द्र**ले नेपाली लघुकथा क्षेत्रमा महत्वपूर्ण योगदान पुर्याउने चार विशिष्ट व्यक्तित्वहरूलाई सम्मानित गर्ने घोषणा गरेको छ। केन्द्रका अध्यक्ष डा. शेखरकुमार श्रेष्ठको अध्यक्षतामा चैत्र ३० गते सोमबार बसेको कार्यसमिति बैठकले वर्ष २०८२ का लागि यी प्रतिष्ठित सम्मानहरूको निर्णय गरेको हो।
सम्मानित हुने स्रष्टाहरूको नामावली सार्वजनिक गर्दै केन्द्रले काठमाडौँ निवासी वरिष्ठ साहित्यकार महेश प्रसाईंलाई ‘हाम्रो लघुकथा केन्द्र–२०८२’ सम्मान र भैरहवा निवासी प्राडा कपिल लामिछानेलाई ‘हाम्रो लघुकथा समालोचना सम्मान–२०८२’ प्रदान गर्ने जानकारी दिएको छ। यी दुवै सम्मानको राशि जनही ११,१११ रुपैयाँ रहेको छ। त्यस्तै, कपन काठमाडौँ निवासी गङ्गा कर्माचार्य पौडेललाई ‘हाम्रो लघुकथा नारी सम्मान–२०८२’ र सुनसरीका स्रष्टा रमेन्द्र कोइरालालाई ‘योगनाथ बास्तोला लघुकथा सम्मान–२०८२’ बाट विभूषित गरिने भएको छ। यी दुई सम्मानको राशि जनही ५,५५५ रुपैयाँ तोकिएको छ।
वरिष्ठ साहित्यकार किशोर पहाडी, जयदेव भट्टराई र केन्द्रका सहसचिव मिसु श्रेष्ठ सम्मिलित स्रष्टा छनोट समितिको सिफारिसमा यी नामहरू तय गरिएका हुन्। यी पुरस्कारहरू केन्द्रको अक्षय कोषका साथै विभिन्न दाताहरूबाट प्राप्त सहयोगबाट स्थापना भएका हुन्। जनार्दन पौडेलले आफ्ना मातापिता रामकेशर र भवानी पौडेलको स्मृतिमा, कमल केसीले मातापिता सुकु र बिजु खत्रीको स्मृतिमा तथा कृष्णप्रसाद बास्तोलाले आफ्ना स्वर्गीय पिता योगनाथ बास्तोलाको स्मृतिमा यो सम्मान राशि उपलब्ध गराउँदै आउनुभएको छ।
केन्द्रका सचिव रामराजा केसीका अनुसार यी सबै सम्मानहरू आगामी २०८३ वैशाख १९ गते शनिबारका दिन एक विशेष समारोहका बीच वितरण गरिनेछ। उक्त कार्यक्रम केन्द्र दर्ता भएको स्थान दक्षिणकाली नगरपालिका वडा नं ३ मा रहेको गणेश हलमा आयोजना हुनेछ। नेपाली लघुकथाको उत्थान र स्रष्टाहरूको मनोबल उच्च राख्न केन्द्रले यस्ता कार्यक्रमलाई निरन्तरता दिँदै आएको छ।
