राष्ट्रिय निजी तथा आवासीय विद्यालय संगठन (नेसनल प्याब्सन) भक्तपुरले आफ्ना सदस्य विद्यालयहरूमा कार्यरत ३४१ जना शिक्षक र लेखापालहरूका लागि एक बृहत् तालिम कार्यक्रम सफलतापूर्वक सम्पन्न गरेको छ। यस तालिमले शिक्षकहरूलाई दक्ष र अब्बल बनाइ शिक्षण सिकाइ क्रियाकलापलाई प्रभावकारी बनाउनुका साथै सिकाइ उपलब्धि हासिल गर्न मद्दत पुग्ने अपेक्षा गरिएको छ।
यस तालिम अन्तर्गत जेठ २४ गते शनिबार कक्षा ४ देखि ८ सम्मका गणित विषयका शिक्षकहरूलाई डा. रमेश प्रसाद अवस्थीले प्रशिक्षण दिएका थिए भने सामाजिक विषयका लागि जीवन राज पन्थी र प्रभाति किरणले सहजीकरण गरेका थिए। जेठ ३१ गते लेखापालहरूलाई सी.ए. सुनिल श्रेष्ठले व्यवस्थित लेखा प्रणाली र कर सम्बन्धी अभिमुखीकरण तालिम दिएका थिए। असार ७ गते पूर्व प्राथमिक तहका शिक्षकहरूका लागि डा. मिनाक्षी दाहालले सहजीकरण गरेका थिए भने सोही दिन नेपाली विषयका लागि प्रोफेसर डा. ध्रुव कुमार घिमिरे र विज्ञान विषयका लागि डा. चिन्तामणी पन्थीले प्रशिक्षण दिएका थिए।
तालिम उपसमिति संयोजक रमेश प्रसाद सिटौलाले विगतमा पनि यस्ता तालिमहरू सञ्चालन गरिएको र भविष्यमा पनि सदस्य विद्यालयहरूको सुदृढीकरणका लागि थप कार्यक्रम गरिने बताए। नेसनल प्याब्सन भक्तपुरका अध्यक्ष संजय खड्काले यस तालिमले शिक्षकहरूलाई पाठ्यक्रम, सिकाइ उपलब्धि र शिक्षण विधि लगायतका क्षेत्रमा सक्षम बनाउनुका साथै विद्यालयको समग्र गुणस्तरमा अभिवृद्धि गर्ने विश्वास व्यक्त गरे। कार्यक्रम सफल बनाउन सहयोग पुर्याउने सत्यशक्ति पुस्तक भण्डार, यूरेका पब्लिकेशन, ग्रीन बुक्स र ओएसिस पब्लिकेशनलाई नेसनल प्याब्सन भक्तपुरका कोषाध्यक्ष विक्रम थापाले धन्यवाद ज्ञापन गरे।
