चिकित्सा विज्ञान र प्रविधिको क्षेत्रमा चीनले एक ऐतिहासिक फड्को मारेको छ। ‘इन्भेसिभ’ ब्रेन–कम्प्युटर इन्टरफेस (BCI) प्रविधिलाई व्यावसायिक प्रयोगका लागि आधिकारिक अनुमति दिने चीन विश्वकै पहिलो राष्ट्र बनेको छ। चीनको नेसनल मेडिकल प्रोडक्ट्स एडमिनिस्ट्रेसन (NMPA) ले शाङ्घाईस्थित ‘न्युराकल मेडिकल टेक्नोलोजी’ द्वारा विकास गरिएको ‘नियो’ (NEO) नामक उपकरणलाई बजारमा ल्याउने स्वीकृति प्रदान गरेसँगै पक्षाघात भएका बिरामीहरूका लागि उपचारको नयाँ ढोका खुलेको छ।
‘नियो’ एउटा सिक्का आकारको अत्याधुनिक चिप हो, जसलाई शल्यक्रियामार्फत मस्तिष्कमा प्रत्यारोपण गरिन्छ। जब कुनै बिरामीले आफ्नो अङ्ग चलाउने प्रयास गर्छन्, तब यो चिपले मस्तिष्कबाट उत्पन्न हुने विद्युतीय संकेतहरूलाई तत्काल पहिचान गर्छ। यी संकेतहरूलाई कृत्रिम बुद्धिमत्ता (AI) को सहायताले विश्लेषण गरी कम्प्युटर वा रोबोटिक उपकरणहरूमा पठाइन्छ। यसका माध्यमबाट बिरामीले आफ्नो सोचको भरमा रोबोटिक हात वा अन्य सहायक उपकरणहरू चलाएर वस्तुहरू समात्ने र उठाउने जस्ता क्रियाकलाप गर्न सक्छन्।
हाल १८ देखि ६० वर्ष उमेर समूहका मेरुदण्डको चोटका कारण हात चलाउन असमर्थ रहेका बिरामीहरूका लागि लक्षित यो प्रविधि क्लिनिकल परीक्षणमा अत्यन्त सफल देखिएको छ। परीक्षणमा सहभागी धेरै बिरामीहरू शल्यक्रियाको एक महिनाभित्रै घरमै बसेर यो उपकरण आफैँ सञ्चालन गर्न सक्षम भएका छन्।
विश्वका अन्य विकसित राष्ट्रहरू जस्तै अमेरिका, जर्मनी र अस्ट्रेलिया पनि बीसीआई प्रविधिको प्रतिस्पर्धामा रहेका बेला चीनले व्यावसायिक अनुमति दिँदै आफूलाई यस क्षेत्रमा अग्रस्थानमा उभ्याएको छ। चीनले यस प्रविधिलाई आफ्नो राष्ट्रिय रणनीतिक प्राथमिकतामा राख्दै भविष्यमा स्वास्थ्य उपचार बाहेक अन्य क्षेत्रमा पनि यसको विस्तार गर्ने योजना अघि सारेको छ।
