शैक्षिक उत्कृष्टता र विद्यार्थीको चौतर्फी विकासमा आफूलाई अब्बल सावित गर्दै आएको भक्तपुरस्थित मदरल्याण्ड स्कुलले आफ्नो २१औँ वार्षिकोत्सवको अवसरमा “सम्मान तथा प्रतिभा प्रस्तुतीकरण–२०८२” एवं पूर्व-प्राथमिक तहको दीक्षान्त समारोह चैत्र २८ गते भव्य रूपमा सम्पन्न गरेको छ।
कार्यक्रमको सुरुवात निकै नै रोचक र भिन्न शैलीमा गरिएको थियो। ठूला ओहोदाका प्रमुख अतिथि बोलाउने पुरानो परम्परालाई तोड्दै विद्यालयका सबैभन्दा साना ‘प्ले-ग्रुप’ कक्षाका दुई जना विद्यार्थीले बिरुवामा जल अर्पण गरी कार्यक्रमको औपचारिक उद्घाटन गरेका थिए। प्रकृति र भविष्यका कर्णधारलाई जोडिएको विद्यालयको यो नौलो प्रयासलाई उपस्थित अभिभावकहरूले खुलेर प्रशंसा गरेका थिए।
समारोहलाई सम्बोधन गर्दै विद्यालयका प्रिन्सिपल संजय खड्काले मदरल्याण्डको २१ वर्षे यात्राको सफलताको श्रेय अभिभावकहरूको अटुट विश्वास र योगदानलाई दिनुभयो। उहाँले आगामी कार्ययोजनाबारे जानकारी दिँदै अबको लक्ष्य विद्यालयलाई थप सुविधासम्पन्न भौतिक पूर्वाधारसहितको उत्कृष्ट शैक्षिक गन्तव्य बनाउनु रहेको बताउनुभयो। प्रिन्सिपल खड्काले विद्यालयमा प्रि-स्कुललाई पूर्ण रूपमा पाठ्यपुस्तक मुक्त गरिएको, स्कुल हेल्थ नर्सको व्यवस्था गरिएको र प्रविधिको उच्च प्रयोगमार्फत विद्यार्थीहरूको व्यक्तित्व विकासमा जोड दिइएको तर्क राख्नुभयो।
शैक्षिक वर्ष २०८२ मा मदरल्याण्डका विद्यार्थीहरूले पालिकादेखि अन्तर्राष्ट्रिय स्तरसम्म आफ्नो प्रतिभाको लोहा मनाउन सफल भएका छन्। सोही अवसरमा राष्ट्रिय र अन्तर्राष्ट्रिय स्तरमा पदक भित्र्याउने ५६ जना प्रतिभाशाली विद्यार्थीहरूलाई विशेष सम्मान गरियो। साथै वर्षभरि विविध विधामा उत्कृष्ट हुने १५ विद्यार्थी र लगनशील शिक्षकहरूलाई समेत पुरस्कृत गरियो। कक्षागत रूपमा उत्कृष्ट GPA हासिल गर्ने विद्यार्थीहरू र प्रि-स्कुलदेखि कक्षा ३ सम्म कक्षा स्तरोन्नति हुने सबै नानीबाबुहरूलाई सम्मान प्रदान गरिएको थियो।
कार्यक्रममा ईसिडी एक्सपर्ट एवं प्रि-स्कुल को-अर्डिनेटर सुमित्रा राणामगरले विद्यालयमा पूर्ण रूपमा मन्टेश्वरी र आधुनिक शिक्षण पद्धति लागू गरिएको स्पष्ट पार्नुभयो। त्यस्तै एकेडेमिक को-अर्डिनेटर धारणा स्यान्दिल्य (काफ्ले) ले आगामी शैक्षिक सत्र २०८३ का लागि तय गरिएको आन्तरिक मूल्याङ्कन र शैक्षिक रणनीतिबारे प्रकाश पार्नुभएको थियो।
विद्यालय व्यवस्थापन समितिका अध्यक्ष रामकृष्ण खड्काको सभापतित्वमा सम्पन्न उक्त भव्य समारोहमा विद्यार्थीहरूले नेपाली मौलिक संस्कृति झल्कने आकर्षक नृत्य, गीत र नाटक प्रस्तुत गरेका थिए। विद्यालयकी संचालिका एक्ज्यूकेटिभ हेड शर्मिला देउजाको निर्देशनमा सम्पन्न उक्त कार्यक्रमको कुशल सञ्चालन शिक्षक शृष्टि कासुलाले गर्नुभएको थियो।
