मध्यपुर थिमि नगरपालिकाको शिक्षा शाखाद्धारा स्थानीय पाठ्यक्रम सम्बन्धी शिक्षकहरुलाई दुई दिने अभिमुखिकरण कार्यक्रम सम्पन्न भएको छ ।
स्थानीय पाठ्यक्रम तयारी समितिका संयोजक एवं मथिनपा वडा नं. २ का वडाध्यक्ष श्रीकृष्ण श्रेष्ठको सभापतित्वमा भएको उक्त अभिमुखिकरण कार्यक्रमको उद्घाटन गर्दै मध्यपुर थिमि नगरप्रमुख सुरेन्द्र श्रेष्ठले अभिमुखिकरणबाट सिकेको सिप र ज्ञान विद्यार्थीहरुमा हस्तान्तरण गरि स्थानीय पाठ्यक्रमलाई प्रभावकारी रुपमा लागु गर्न शिक्षकहरुसँग आग्रह गरे ।
नगरप्रमुख श्रेष्ठले मध्यपुर थिमिको भौगोलिक, ऐतिहासिक, सांस्कृतिक, धार्मिक एवं पर्यटकीय गतिविधिसहितको पाठ्यक्रम निर्माण भएको र आगामी शैक्षिकसत्रदेखि पाठ्यपुस्तकको रुपमा सबै शिक्षकलाई उपलब्ध गराउने तयारी भइरहेको पनि जानकारी दिए । मथिनपा शिक्षाशाखा प्रमुख ज्ञानेन्द्र प्रसाद भ , मथिनपाका प्रमुख प्रशासकीय अधिकृत रामबहादुर के.सी., मध्यपुर नगर प्याब्सनका अध्यक्ष निलेश आचार्य लगायतका वक्ताहरुले मध्यपुर थिमिको मौलिक पहिचान कायम हुने किसिमले कक्षा ६ देखि ८ सम्मको पाठ्यक्रम तयार भएको बताए ।
मध्यपुर थिमि क्षेत्रका शिक्षाकर्मी, संस्कृतिकर्मी एवं सम्पदाकर्मीहरु प्रा.रामकृष्ण दुवाल, ई.राजेन्द्र तुबन्जा श्रेष्ठ, बुद्धिकुमार घो, धर्मसुन्दर बज्राचार्य, ओम नरहरि श्रेष्ठ लगायतका स्थानीय पाठ्यक्रम निर्माता एवं प्रशिक्षकहरुले शिक्षकहरुलाई प्रशिक्षण दिएका थिए । मध्यपुर थिमि नगरक्षेत्र भित्र संचालित सामुदायिक र संस्थागत विद्यालयमा कार्यरत सामाजिक शिक्षक एवं स्थानीय पाठ्यक्रम अध्यापनरत शिक्षकशिक्षिकाहरुको सहभागिता रहेको उक्त २ दिने अभिमुखिकरण कार्यक्रम आदर्श माध्यामिक विद्यालय सानोठिमीको सभाहलमा भएको थियो ।
उक्त अभिमुखिकरण कार्यक्रममा मध्यपुर थिमिको भौगालिक अवस्थिति, सामाजिक अवस्था, स्थानीय भेषभूषा, परम्परा, संस्कृति, संस्कार, पेशा व्यवसाय, मौलिक नाम, मूर्तअमूर्त सम्पदा आदि बारे जानकारी दिइएको थियो । अन्तक्र्रियात्मक उक्त अभिमुखिकरणमा मध्यपुर थिमिका सम्पदा, संस्कृति, चाडपर्वदेखि जात्रा, नाच आदि बारे पनि प्रशिक्षण दिइएको थियो ।
