विश्वविद्यालय अनुदान आयोगको सहयोगमा ख्वप कलेजमा सञ्चालित ‘उद्यमशीलता सहयोग कार्यक्रम’ बिहीबारबाट सुरु भएको छ ।
भक्तपुर नगरपालिकाका प्रमुख एवं कलेज सञ्चालक समितिका अध्यक्ष सुनिल प्रजापतिले कार्यक्रम उद्घाटन गर्दै विश्वविद्यालय शैक्षिक प्रमाणपत्र बेच्ने संस्था हुन नहुने धारणा राखे । शिक्षालाई उत्पादन श्रमसँग जोड्न सके बेरोजगारी हट्ने उल्लेख गर्दै उनले भने, “भक्तपुर नगरपालिकाले उद्यमशीलता जोड दिई विभिन्न व्यवसायिक तथा सीपमुलक (हेयर कटिङ, सिलाई, पाक कला, कम्प्युटर, चिनियाँ र जापानी भाषा, प्लम्बिङ, डकर्मी, श्रृङ्गार) तालिमहरु सञ्चालन गरिरहेको छ । नगरपालिकाले उद्यमशीलता टेवा दिने उद्देश्यले रु. ५ लाखसम्म उद्यमशीलता ऋण उपलब्ध गराउँदै आएको छ । उद्यमशीलता प्रवद्र्धन गर्ने विषयमा ख्वप कलेज विश्वविद्यालय अनुदान आयोगसँग सहकार्य गर्न तयार छ ।”
विश्वविद्यालय अनुदान आयोगका अनुसन्धान निर्देशक प्रा.डा. लालप्रसाद आम्गाइँले देशको भविष्य युवाहरुको हातमा हुने चर्चा गर्दै भन्नुभयो, “युवा जस्तो हुन्छ, देश पनि त्यस्तै हुनेछ” । श्रमता अभिवृद्धि, उद्यमशीलता, अनुसन्धान, वृत्ति विकासलगायत विभिन्न कार्यक्रमहरु सञ्चालन गरी देशभरका १,५१६ क्याम्पससँग विश्वविद्यालय अनुदान आयोगको कार्यालयले सहकार्य गरिरहको उनले जानकारी दिए ।
ख्वप कलेजका प्राचार्य प्रकाशकुमार श्रेष्ठले कार्यक्रमले लिएको लक्ष्यलाई पूरा गर्न सहभागीहरु उत्सावद्र्धक रुपमा लाग्नुपर्ने खाँचो औँल्याए ।
कर्यक्रम संयोजक उपप्राध्यापक अञ्जु ग्वाछाले कार्यक्रम ‘३ क्रेडिट आवर’ को हुने र तालिमको सिलसिलामा फिल्डभिजिट, सेमिनार, अनुभव आदानप्रदान, सफल व्यवसायीसँग अन्तरक्रियालगायतको कार्यक्रम हुने जानकारी दिए । कार्यक्रममा उपप्राध्यापक सुनिता गाइसीले पनि बोलेका थिए ।
