अनुसन्धान, नवप्रवर्तन र प्राविधिक ज्ञान आदानप्रदान गर्ने उद्देश्यका साथ कान्तिपुर इन्जिनियरिङ कलेजको प्राङ्गणमा ‘केइसी कन्फरेन्स २०२६’ सफलतापूर्वक सम्पन्न भएको छ। यस सम्मेलनले सिभिल, कम्प्युटर र इलेक्ट्रोनिक्स इन्जिनियरिङका क्षेत्रमा कार्यरत प्राज्ञिक व्यक्तित्व, अनुसन्धानकर्ता, पेशेवर इन्जिनियर र विद्यार्थीहरूलाई एउटै मञ्चमा ल्याएर नवीनतम् खोज र प्राविधिक ज्ञान साझा गर्ने अवसर प्रदान गरेको छ।

सम्मेलनमा कुल ४३ वटा अनुसन्धानमूलक शोधपत्रहरू प्रस्तुत गरिएका थिए। जसमा सिभिल इन्जिनियरिङ विधाबाट १९ वटा र कम्प्युटर तथा इलेक्ट्रोनिक्स इन्जिनियरिङसँग सम्बन्धित विधाहरूबाट २४ वटा शोधपत्रहरू समावेश थिए। यसका साथै सम्मेलनमा ‘सेफ एन्ड सस्टेनेबल ट्राभल नेपाल’ र ‘सोसाइटी अफ ट्रान्सपोर्ट इन्जिनियर्स नेपाल’ सँगको सहकार्यमा ‘ट्राफिक तथा यातायात इन्जिनियरिङ’ सम्बन्धी विशेष सिम्पोजियम समेत आयोजना गरियो जहाँ यस क्षेत्रका ७ वटा महत्वपूर्ण कार्यपत्रहरू प्रस्तुत गरिएका थिए।

कार्यक्रमको उद्घाटन सत्रमा प्रमुख अतिथि एवं इन्जिनियरिङ अध्ययन संस्थानका डीन प्रो. डा. सुशील बहादुर बज्राचार्य र नेपाल इन्जिनियर्स एशोसिएशनका अध्यक्ष इ. सुवासचन्द्र बरालको विशिष्ट उपस्थिति रहेको थियो। दुवै दिग्गज व्यक्तित्वहरूले इन्जिनियरिङ शिक्षा र व्यावसायिक अभ्यासमा अनुसन्धान, नवप्रवर्तन र अन्तरविषयगत सहकार्यको महत्त्वमाथि जोड दिँदै प्रेरणादायी मन्तव्य राख्नुभएको थियो। सोही अवसरमा विशिष्ट अतिथिहरूद्वारा सम्मेलनका लागि छनोट भएका सम्पूर्ण शोधपत्रहरूको संक्षिप्त संग्रह (Abstracts) आधिकारिक रूपमा विमोचन गरिएको थियो।

सम्मेलनमा मुख्य वक्ताका रूपमा डा. पवन भट्टराई र प्रो. डा. सुवर्ण शाक्यले इन्जिनियरिङ र प्रविधिको क्षेत्रमा भइरहेका उदीयमान प्रवृत्ति र पछिल्ला प्रगतिहरूका बारेमा आफ्ना महत्वपूर्ण धारणाहरू राख्नुभएको थियो। प्राविधिक सत्रहरूलाई व्यवस्थित बनाउन सातवटा समानान्तर सत्रहरू सञ्चालन गरिएका थिए, जसमध्ये चारवटा सत्र कम्प्युटर तथा इलेक्ट्रोनिक्स र तीनवटा सत्र सिभिल इन्जिनियरिङका लागि छुट्याइएका थिए। प्रत्येक सत्रमा सम्बन्धित क्षेत्रका विज्ञहरूले विशेष प्रस्तुति दिँदै सहभागीहरूबीच गहन प्राज्ञिक छलफल र ज्ञानको आदानप्रदान गराउनुभएको थियो।

निर्धारित सत्र अध्यक्षहरूको उपस्थितिमा सञ्चालित सबै सत्रहरूले सम्मेलनलाई थप गरिमामय र व्यवस्थित बनाएका थिए। केइसी कन्फरेन्स २०२६ को सफल समापनले अनुसन्धान संस्कृति प्रवर्द्धन, प्राज्ञिक उत्कृष्टता र व्यावसायिक सहकार्यप्रति कान्तिपुर इन्जिनियरिङ कलेजको अटुट प्रतिबद्धतालाई पुनः पुष्टि गरेको छ।