बागमती प्रदेशको राजधानी हेटौँडामा स्वास्थ्य सेवा र चिकित्सा शिक्षाको क्षेत्रमा एक ऐतिहासिक फड्को मारिएको छ। मदन भण्डारी स्वास्थ्य विज्ञान प्रतिष्ठान अन्तर्गत सञ्चालित हेटौँडा अस्पतालको अत्याधुनिक नयाँ भवन उद्घाटन हुनुका साथै प्रतिष्ठानलाई विश्वविद्यालयका रूपमा विकास गर्ने प्रक्रिया औपचारिक रूपमा अघि बढेको छ।
बागमती प्रदेशका मुख्यमन्त्री इन्द्रबहादुर बानियाँले २८ करोड ५४ लाख ६३ हजार रुपैयाँको लागतमा निर्मित तीनवटा आधुनिक ब्लकहरूको उद्घाटन गर्नुभयो। ६ तले एक र ५–५ तलाका दुईवटा ब्लकहरू सहितको यो संरचनाले अस्पतालमा २०० नयाँ शय्या थप गरी कुल क्षमता ५०० पुर्याएको छ। लिफ्ट, फायर सेफ्टी र भूकम्प प्रतिरोधी प्रविधि जडान गरिएको यो भवनले स्वास्थ्य सेवालाई थप व्यवस्थित बनाउने अपेक्षा गरिएको छ।
अस्पतालको सेवा विस्तारसँगै मुख्यमन्त्री बानियाँले प्रतिष्ठानको नयाँ शैक्षिक भवनको समेत शिलान्यास गर्नुभयो। कार्यक्रमलाई सम्बोधन गर्दै उहाँले अहिले भर्ना भएका विद्यार्थीले प्रमाणपत्र लिने बेलासम्म यो संस्था ‘मदन भण्डारी स्वास्थ्य विज्ञान विश्वविद्यालय’ भइसक्ने घोषणा गर्नुभयो। प्रदेश सरकारले यसका लागि आवश्यक कानुनी प्रक्रिया अघि बढाइसकेको जानकारी दिँदै गुणस्तरीय स्वास्थ्य सेवामा सबैको पहुँच पुर्याउन सरकार प्रतिबद्ध रहेको बताउनुभयो।
हेटौँडा अस्पतालले मिर्गौला उपचारमा पनि उल्लेख्य प्रगति गरेको छ। यसअघि १४ वटा मात्र मेसिन रहेको डायलाइसिस युनिटमा १६ वटा नयाँ मेसिन थप गरी अब कुल ३० वटा पुर्याइएको छ। अस्पतालले निकट भविष्यमै मिर्गौला प्रत्यारोपण सेवासमेत सुरु गर्ने लक्ष्य राखेको छ। प्रतिष्ठानमा हाल एमबिबिएस र एमडी तहको अध्ययन–अध्यापन सुरु भइसकेको छ। यहाँबाट उत्पादित जनशक्तिलाई प्रदेशका १३ वटै जिल्लामा परिचालन गरी नागरिकलाई दैलोमै विशेषज्ञ सेवा दिने रणनीति बनाइएको छ।
स्वास्थ्यमन्त्री किरण थापामगरले औषधि र उपकरणको अभाव हुन नदिने प्रतिबद्धता जनाउँदै गरिब परिवारका विद्यार्थीका लागि छात्रवृत्ति कार्यक्रम सञ्चालन भइरहेको जानकारी दिनुभयो। नयाँ पूर्वाधार र प्रविधिको आगमनसँगै हेटौँडा अस्पताल अब बागमती प्रदेशकै एक प्रमुख विशिष्टीकृत स्वास्थ्य केन्द्र र चिकित्सा शिक्षाको हबका रूपमा स्थापित भएको छ।
