कागेश्वरी मनोहरा नगरपालिकाले सेवा प्रवाहमा उत्कृष्टता हासिल गर्ने र ज्ञान–आधारित नेतृत्व क्षमतामा उन्नति गर्ने महत्त्वपूर्ण उद्देश्यका साथ काठमाडौँ विश्वविद्यालय स्कूल अफ म्यानेजमेन्ट (KUSOM) सँग सहकार्य गर्ने भएको छ।
नगरपालिकाले अनुसन्धान, सर्वेक्षण, व्यवस्थापन सम्बन्धी तालिम, र नीति विकास जस्ता महत्वपूर्ण क्षेत्रहरूमा निकट भविष्यमा समझौता पत्र मार्फत दिगो सहकार्य स्थापना गर्ने विषयमा KUSOM का डिन डा. विजय केसीसँग औपचारिक भेटघाट सम्पन्न गरेको छ। नगर प्रमुख उपेन्द्र काकीको नेतृत्वमा अध्ययन तथा अनुसन्धान शाखाका प्रतिनिधिहरूले यो समन्वयलाई मूर्त रूप दिएका छन्।
यो सहकार्य स्थानीय सरकारको नीति निर्माण प्रक्रियालाई थप वैज्ञानिक र तथ्यमा आधारित बनाउनका लागि कोशेढुङ्गा साबित हुने अपेक्षा गरिएको छ। नगरपालिकाका प्रतिनिधिहरूले भेटघाटका क्रममा KUSOM को अत्याधुनिक Policy Lab को समेत अवलोकन गरेका छन्। यस प्रकारको साझेदारीले शैक्षिक संस्था र स्थानीय सरकारबीचको सम्बन्धलाई नयाँ उचाइमा पुर्याउने विश्वास लिइएको छ।
नगरपालिकाले अनुसन्धान, नीति निर्माण, र उद्यमशीलतामा अग्रणी बन्ने आफ्नो प्रतिबद्धतालाई दोहोर्याउँदै यस सहकार्यले कागेश्वरी मनोहरालाई ज्ञान, अनुसन्धान र नवप्रवर्तनमा स्थापित नगर बनाउन महत्वपूर्ण योगदान पुर्याउने जनाएको छ।
