निजी तथा आवासीय विद्यालय अर्गनाइजेशन नेपाल (प्याब्सन) सिद्धार्थनगरको आयोजनामा विद्यार्थीहरूमा निहित रचनात्मक क्षमता प्रस्फुटन गराउने उद्देश्यका साथ एक भव्य चित्रकला प्रतियोगिता सम्पन्न भएको छ। प्याब्सन सिद्धार्थनगरको वार्षिक कार्यतालिका अन्तर्गत आयोजित यस प्रतियोगितामा नगरभित्रका विभिन्न संस्थागत विद्यालयका कक्षा १ देखि ३ सम्मका साना बालबालिकाहरूको उत्साहजनक सहभागिता रहेको थियो।
प्रतियोगिताका बारेमा प्रकाश पार्दै सिद्धार्थनगर प्याब्सनका अध्यक्ष कुमार मल्लीले संस्थाले विद्यार्थी, शिक्षक, प्रधानाध्यापक र समग्र समाजको चौतर्फी विकासका लागि निरन्तर अतिरिक्त क्रियाकलापहरू सञ्चालन गर्दै आएको बताए। हरेक बालबालिकामा फरक र अद्वितीय प्रतिभा हुने उल्लेख गर्दै उनले गणित र विज्ञानले तार्किक क्षमता, भाषाले भाषिक दक्षता तथा खेलकुदले शारीरिक विकास गराउने धारणा राखे। यसैगरी, चित्रकला यस्तो विशेष माध्यम भएको र यसले साना बालबालिकाको सोच्ने शैली, हेर्ने दृष्टिकोण एवं लुकेको रचनात्मक क्षमतालाई उजागर गर्न सबैभन्दा महत्वपूर्ण भूमिका खेल्ने दाबी समेत उनले गरे।
कार्यक्रमकी संयोजक एवं यूरो किड्स भैरहवाकी प्रिन्सिपल प्रतिष्ठा चालिसे मल्लका अनुसार यस पटकको प्रतियोगिताको मुख्य विषय **’मेरो सपना, मेरो स्कुल’** राखिएको थियो। यस विशेष विषयवस्तुमा रहेर साना बालबालिकाहरूले आफ्नो विद्यालयप्रतिको साँचो भावना, माया र भविष्यको कल्पनालाई रङ र ब्रसको माध्यमबाट क्यानभासमा कलात्मक रूपले उतारेका थिए।
कलाको महत्वमाथि जोड दिँदै संयोजक मल्लले रङ र कलाले बालबालिकाको जीवनलाई रंगीन मात्र नबनाई उनीहरूलाई भावनात्मक र सामाजिक रूपमा समाजसँग जोड्न पनि ठूलो मद्दत गर्ने विश्वास व्यक्त गरिन्। साथै, बालबालिकाले कोर्ने चित्र र उनीहरूले छनोट गर्ने रङहरूबाट उनीहरूको मानसिकता, रुचि र व्यक्तित्वलाई सजिलै बुझ्न सकिने धारणा समेत उनले व्यक्त गरिन्।
प्याब्सन सिद्धार्थनगरमा आबद्ध २६ वटा सदस्य विद्यालयहरूमध्ये प्रतियोगितामा १९ भन्दा बढी विद्यालयका प्रतिभावान बालबालिकाहरूले कडा प्रतिस्पर्धा गरेका थिए। साना उमेरका विद्यार्थीहरूमा लुकेको कला कौशललाई प्रोत्साहन गर्न र उनीहरूको आत्मबल बढाउनका लागि यस्ता प्रतियोगिताहरू आगामी दिनमा पनि निरन्तर आयोजना गरिने आयोजकले जनाएको छ।
