आजको तीव्र गतिमा विकसित भइरहेको प्रविधिमैत्री युगमा शिक्षण सिकाइ प्रक्रियालाई थप प्रभावकारी, सिर्जनात्मक र विद्यार्थी केन्द्रित बनाउन डिजिटल प्रविधि र कृत्रिम बुद्धिमत्ता (AI) को प्रयोग अपरिहार्य बन्दै गएको छ। यसै सन्दर्भलाई आत्मसात गर्दै, मिनर्वा इङ्ग्लिस स्कूलमा शिक्षकहरूको पेसागत दक्षता अभिवृद्धि तथा आधुनिक शिक्षण पद्धतिलाई प्रविधिसँग जोड्ने उद्देश्यका साथ “Effective PPT Design and Enhancing AI in School Teaching” विषयक एकदिने विशेष तालिम कार्यक्रम भव्य रूपमा सम्पन्न भएको छ।
विद्यालयको आफ्नै सभाहलमा २०८३ साल जेठ २ गते आयोजित उक्त कार्यक्रममा विद्यालयका सम्पूर्ण शिक्षकहरूको उत्साहजनक तथा सक्रिय सहभागिता रहेको थियो। यस तालिमले शिक्षकहरूलाई आधुनिक शिक्षण शैलीबारे नयाँ सोच, सीप तथा व्यवहारिक ज्ञान प्रदान गरेको विद्यालय प्रशासनले जनाएको छ।
तालिम कार्यक्रममा विशेष गरी दुईवटा महत्त्वपूर्ण पक्षहरूमा केन्द्रित रहेर प्रशिक्षण दिइएको थियो। पहिलो चरणमा प्रभावकारी PowerPoint Presentation (PPT) तयार गर्ने आधुनिक तरिकाहरू, प्रस्तुतीकरणलाई आकर्षक तथा अन्तरक्रियात्मक बनाउने विधि, र शिक्षण सामग्रीलाई दृश्यात्मक रूपमा विद्यार्थीमैत्री बनाउने सीपहरू सिकाइएको थियो।
दोस्रो तथा मुख्य चरणमा, AI उपकरणहरूको प्रयोग गरी शिक्षण प्रक्रियालाई कसरी सहज, छरितो र प्रभावकारी बनाउन सकिन्छ भन्ने विषयमा विस्तृत प्रशिक्षण प्रदान गरिएको थियो। तालिममा एआई (AI) को प्रयोगमार्फत प्रश्नपत्र निर्माण गर्ने शैली, वैज्ञानिक पाठयोजनाको तयारी, नयाँ शिक्षण सामग्री र सिर्जनात्मक कन्टेन्टको विकासका साथै विद्यार्थीहरूको डिजिटल मूल्याङ्कन तथा शिक्षण सहजीकरणका विविध पक्षहरूमा व्यावहारिक अभ्यास गराइएको थियो।
कार्यक्रमलाई सम्बोधन गर्दै विद्यालयका प्राचार्य राजेन्द्र दुवालले वर्तमान शिक्षा प्रणालीमा ‘Digital Pedagogy’ को भूमिका अत्यन्त महत्त्वपूर्ण बन्दैगएको उल्लेख गर्नुभयो। उहाँले बदलिँदो विश्व परिवेशसँगै हाम्रो शिक्षण शैलीमा पनि परिवर्तन आवश्यक रहेको बताउँदै विद्यालय शिक्षणलाई प्रविधिमैत्री बनाउनु आजको आवश्यकता भएको धारणा व्यक्त गर्नुभयो।
प्राचार्य दुवालले कृत्रिम बुद्धिमत्ता (AI) प्रविधिको सकारात्मक तथा जिम्मेवार प्रयोगले शिक्षकहरूको कार्यक्षमता वृद्धि गर्नुका साथै विद्यार्थीहरूको सिकाइ प्रक्रियालाई अझ बढी रुचिकर, प्रभावकारी र अनुसन्धानमुखी बनाउन सहयोग पुग्ने बताउनुभयो। आगामी दिनमा पनि विद्यालयले यस्ता प्रविधिमूलक तथा क्षमता अभिवृद्धिमूलक कार्यक्रमहरूलाई निरन्तरता दिने प्रतिबद्धता उहाँले जनाउनुभयो।
उक्त उच्चस्तरीय तालिम कार्यक्रमको सहजीकरण प्रशिक्षकद्वय सुन्दर ग्वाछा र मनोज केसीले गर्नुभएको थियो। प्राचार्य दुवालले अत्यन्त प्रभावकारी, व्यवहारिक र प्रेरणादायी रूपमा प्रशिक्षण सञ्चालन गर्नुभएकोमा प्रशिक्षकद्वयप्रति विशेष आभार व्यक्त गर्दै तालिममा सक्रियतापूर्वक सहभागी हुने सम्पूर्ण शिक्षकहरूलाई धन्यवाद ज्ञापन गर्नुभयो।
तालिममा सहभागी शिक्षकहरूले यो कार्यक्रम आफ्ना लागि अत्यन्त उपयोगी, समयसापेक्ष र व्यवहारिक रहेको प्रतिक्रिया दिएका छन्। यस किसिमको तालिमले शिक्षकहरूमा नवीन सोच र प्रविधिमैत्री शिक्षण क्षमताको विकास गर्ने र विद्यालयमा प्रविधिमा आधारित आधुनिक शिक्षण संस्कृतिको जग बसाल्न महत्वपूर्ण भूमिका खेल्ने विश्वास विद्यालय परिवारले लिएको छ।
